ደምዬ፡ደም፡ትክላ፡ቱ፡እት፡ልብሎ፡

  ሰብ፡መንሳዕ፡ሚ፡በህሌቶም፡ቱ፧

November 18, 2018

ትክላ፡ላልትበሀል፡ሕያየት፡ከደን፡እት፡ምድር፡መንሳዕ፡ነብር፡ናብራ፡ዎ፡አዜማ፡እት፡ገሌ፡ኣምዳር፡መንሳዕ፡ለሄሌ፡እብል።ትክላ፡ክል፡ዶል፡እብ፡በንኑ፡ልትኔዔ፡{ሀድን)፡ዎ፡ዶል፡ዶል፡ክም፡መልዔት፡ልትጋዓዝ፡ዎ፡ለሀድን።እሊ፡ሕያየት፡እሊ፡ናኣይሽ፡ሕያየት፡ዓድ፡ካራ፡ጠሊት፡ዎ፡ብግዕት፡እብ፡በኑ፡እግል፡ልቅተል፡ቃድር፡ዎ፡መልዔት፡እንዴ፡ገብአው፡ሕያይት፡ዓባይ፡ካራ፡ወአት፡ወይ፡ብዕራይ፡ላመስል፡ሕያዬት፡እግል፡ልቅተሎ፡ቃድሮ።

ትክላ፡ወክድ፡ሕያይት፡ዓድ፡ቀትል፡ሰብ፡ላ፡ሕያየት፡ላእሉ፡ቀትላ፡አረይ፡እግል፡ላትሓዱጎ ምን፡ሓዙ፡ያዕ፡ያዕ፡እት፡ልብሎ፡አክራን፡ወዱ፡ዎ፡ምን፡ኢሓድጎ፡እሎም፡ሼምሼም፡እንዴ፡ላከፈው፡እግል፡ላትሓዱጎ፡ቱ፡ፈትኖ።ዎ፡ኢሓድጌዮ፡እሎም፡ምን፡ገብእ፡ላእሉ፡ወዱ፡ብዕድ፡ጋር፡አሌቦም።እግል፡ሚ፡ልብል፡ፋህም፧

ጌሌኩም፡እግልሚ፡እበን፡መረዊ፡ሓጺን፡ባቅዕ፡ኮናት፡ወይ፡መንዱቅ፡እንዴ፡ወደው፡ኢዘቡጦ፡ትብሉ፡ተሄሉ፧ ሓጺን፡ኮናት፡ወይ፡መንዱቅ፡እንዴ፡ወደው፡ላኢዛቡጦ፡ምስምሳ፡እሊ፡ቱ።

እብ፡ባቅዕ፡ሓጲን፡ወይ፡እብ፡ርሳሰት፡ምን፡ላዳምዕዎ፡ወደሙ፡ ምን፡ልትከዔ፡ላዶል፡ላትክላ፡ላዘነቡ፡እት፡ላደሙ፡ጠቅሾ፡ዎሐር፡እት፡ላዛብጠዎ፡አዳም፡ነጽጎ፡ዎኩሉ፡ላደም፡ላቃጥረ፡እቱ፡ትርክሽ፡እንዴ፡ቤላ፡መይት።

ካሰበት፡እሊ፡ቱ፡እት፡ትክላ፡እበን፡መረዊ፡ሓጺን፡ባቅዕ፡ዎ፡ኮናት፡ላኢልትወገር፡ወይ፡እብ፡ርሳሰት፡መንዱቅ፡ላኢልትቃተል።እግልሚ፡እንዼ፡አድማዐዎ፡ደሙ፡ክም፡ካዓ፡እብ፡ደሙ፡እግል፡ኢልተምትሞም፡ሰበት፡ላፈሩህ፡ቱ።

ካሰበት፡እሊ፡ቱ፡አብዕቦታትና፡እት፡መስሎ፡ደምዬ፡ደም፡ትክላ፡ቱ፡ልብሎ፡ዎእሊ፡ሚ፡በሀለት፡ቱ፧አብ፡ሓጪሩ፡ደምዬ፡ዎይ፡ደም፡አዳምዬ፡  ላልክዔ፡ህቱማ፡ደሙ፡ልትኬዔ፡ዎመይት፡በሀለት፡ቱ፡፡

ካገድም፡ውላድ፡ዎአዋልድ፡ሀይገት፡ዝላላ፡ደምኩም፡ደም፡ትክላ፡ቱ፡ካ፡ዎወሮት፡ኢደፍረኩም፡ላእታ፡ሀሌኩም፡ረአስኩም፡ትክ፡አብሎ፡ ዎገንድሎ፡ዎመን፡አንቱም፡ምን፡ልብሉኩም፡ውላድ፡ዎአዋልድ፡መንሳዕ፡ውላድ፡ውቁል፡ምን፡አዳም፡ዎድሁር፡ምን፡ረቢ፡ቦሎም።  ዎደሓንኩም፡

የጊን፡ወድ፡ህብቴስ፡

እናስ፡መንሳዓይ።