ምድር፡እግል፡በዓል፡ሰብር፡ጻብሕ

(Dawn comes to those who are patient).

By Dr Yegin Hibtes

4/26/2020

 አቡዕቦታትና፡እት፡መስሎ፡ምድር፡እግል፡በዓል፡ሰብር፡ጻብሕ፡ልብሎ፡ዓለው።ዓቤ፡እላ፡መሰል፡እላ፡እት፡እሊ፡ላሀሌና፡እቱ፡ኣውካድ፡ ምን፡ቤትኩም፡ኢትፍገሮ፡ዎክም፡ሓርብ፡ማይ፡እት፡ሻግዒት፡ላልትዋሸቅ፡እት፡ዉሻጤኩም፡ዋቫቆ፡ላልብል፡ዘበን፡ሰበት፡ላዓረና፡እብ፡ምርዱይ፡ዓቢና፡ዎንኡሽና፡ሰብር፡ዎከሃላት፡እግል፡ንትላመድ፡ሀላ፡እልና።

ሕስብ፡ምን፡ነብል፡እሉ፡እሊ፡ሕማም፡ ኮሮና፡ኡኩይ፡ሕማም፡ቱ።ውሉድ፡ዋልደቱ፡ላኢባጽሕ፡እቱ፡እሲት፡ዎእናስ፡እትዎሮት፡ዓርቀይ፡ ላኢሰክቦ፡እቱ፡ጽብሓት፡ምድር፡እንዴ፡ፉራርካ፡ ኣማቃርብ፡እብ፡ድራርካ፡ላኢታዓይር፡እቱ፡ዎቤት፡ክም፡ዕርካ፡ጅናካ፡እት፡ልስዔ፡ምን፡ልትከባታካ፧ያዕ፡ያዕ፡ አስክ፡እትሓጻብ፡ዎልባቬ፡እቃይር፡ኢሓቅፋካ፡ዎኢእስዕማካ፡ላትብል፡እቱ፡ዋቅት፡እብ፡ምርዱይ፡ምስል፡ጾም፡ዎጸሎት፡

ሰብር፡ዓቅል፡ዎካሃላት፡ላትሓዝዮ፡ዘበን፡ቱ።ካሰብር፡ዓቅል፡ዎካሃላት፡እግል፡ንትመሀሮ፡ዎናኣምሮ፡ሀላ፡እልና፡፡ካሰብት፡እሊ፡ሰብር፡ዓቅል፡ዎካሃላት፡ላለታባብዕ፡ገሌ፡ሓሳባት፡እግል፡ኣትካፍሌኩም፡አፍስሑ፡እልዬ።

1፡ጭንቀት፡ዎሓሩቀት፡አውግዞ።

ጭንቀት፡ዎሓሩቀት፡ዎአንጰርጰሮት፡ምን፡ተዉሕዶ፡እሊ፡ኣዉካድ፡ጸገም፡እብ፡ሰላም፡እግል፡ትሕሎፎ፡ቃድሮ።ካ፡ጭንቀት፡ዎሓሩቀት፡ዎአንጰርጰሮት፡ ከአፎ፡እግል፡ነወግዶ፡እንቃድር፡ምን፡ትብሎ፧ኩሉ፡ላእሉ፡ወዱ፡ጋራት፡ወይ፡ዕማማት(Goals)፡እብ፡ሰብር፡ዎካሀላት፡እግል፡ትከሉሶ፡ሀላ፡እልኩም።ላገኣ፡ዕማም፡ቀደም፡አምበቶትኩም፡ከአፎ፡ክም፡ታታልዉ፡ቃደም፡አምበቶትኩም፡እግል፡ትሕሰቦ፡ዎእግል፡ታትዋይኖ፡ እቱ፡ላትሓዜ።እብ፡ሻፋግ፡ላገብእ፡ጋር፡ብዙሕ፡ፋይድት፡አለቡ፡ዸአም፡እንዴ፡ሓሰብካ፡ዎአስታንታንታካ፡ላትወድዮ፡ጋር፡ኣክሩ፡ሰኒ፡ዎዕሙር፡ገብእ።

እት፡መናበረትና፡ሰብር፡ዎካሃላት፡ምን፡ነዘውትር፡ምስል፡ጼዋ፡ቤትና፡ፋትችና፡ዎማሻቂትና፡እብ፡ቀሊል፡እግል፡ንትፋሆሞም፡ዎእግል፡ንቅረቦም፡ዎሰኒ፡ርክብ፡መናበረት፡እግል፡ለሀሌ፡እልና፡ሙርዱይ፡ቱ።

2፡ምንቅስቃስ (Exercise)አዘውትሮ.

እብ፡እሊ፡ዘበን፡እት፡ቤትካ፡ዋሻቆት፡በሊዕ፡ዎስካብ፡ክል፡ሓቴ፡እብ፡ዋክዳ፡ዎዓቀን፡እግል፡ልግባእ፡ ለስትህል።አምበል፡ቅያስ፡እንዴ፡በላዕና፡ምን፡እሰክብ፡ዎክም፡ቀናጽና፡እባእባ፡እንዴ፡ኣብዛሓና፡ምን፡እንወስክ፡እቱ፡ዴርሆ፡ማይ፡እግል፡ንምሰል፡ቱ።ካሰበት፡እሊ፡እት፡ቤት፡ዉቩቃም፡እት፡ሀሌና፡ላእንወድዮ፡ጋራት፡እግል፡አትሀጅገኩም፡አተንሱኒ፧

፨ሰልፍ፡ኩሉ፡ምንቅስቃስ (Exercise)፡ናብዝሕ።እሊ፡ቀሊል፡ጋር፡ቱ።እት፡ጅዋ፡ቤትና፡ወይ፡እት፡አፌትና፡እግል፡ኒደዮ፡ላእንቃድር፡ሀላ።እት፡ምዕል፡ፍንጌ፡5ሽሕ፡ዎክ፡10 ሽሕ፡ስድር፡ምን፡እንገይስ፡ ላእሉ፡በልዓና፡ሓቅቅ፡ዎአልባብና፡ግሩም፡እግል፡ልዝበጥ፡ቃድር።ሓካይም፡አልባብ፡እት፡ምዕል፡10 ሽሕ፡ስድር፡ደው፡እት፡ልብሎ፡መክሮ።

፨ክምሰልሁማ፡ እት፡ እሊ፡ኣዉካድ፡ኮሮና፡እት፡ቤት፡እግል፡ኒደዮ፡ላእንቃድር፡ ሓዲስ፡ጋር፡እግል፡ንፈትን፡ሀላ፡እልና።ክሱሴን፡ዉላድ፡ታብዕን፡ምስል፡ሞኦቫት(Kitchen)፡ቤትኩም፡ሌለዉ።ዎዎሮ፡ሓዲስ፡ሕንክል (Meal)፡እግል፡፡ኖስኩም፡ልግባእ፡ማ፡እግል፡ጼዋ፡ቤትኩም፡አብሽሎ፡፡ሰልፍ፡መረት፡ምን፡ኢትናጁሕ፡ሰአየት፡ኢትቅራጮ፡ካልእ፡ዶል፡ፈትኖ።አና፡ሕልበት፡ላልትበሀል፡አት፡ምድር፡ትግራይ፡ላታአመርኩዎ፡ናብራ፡እግል፡ኢዴ፡ፈተንኮ፡ዎክልኤ፡ዶል፡ጫሕ፡አብልኮ፡ደአም፡ልሳዕ፡እደዬ፡ሀይብ፡ኢሀሌኮ፡ሳልስ፡ዶል፡እግል፡እፈትን፡ቱ።

፨ጌጋ፡ልክለአኒ፡ደኢኮን፡ምን፡አድሕድ፡ሪሞ፡አድሕድ፡አሪሞ፡ኢኮን፡ካሰበት፡ እሊ፡ እግላ፡ረዪምኩም፡ለሀለው፡ዋልደትኩም፡ዎዓባዪ፡ሐዉኩም፡ዎሓዋትኩም፡እብ፡ቴሌፎን፡ሚ፡ሀሌኩም፡ቦሎም።እት፡እሊ፡ዘበን፡ምን፡ቤትካ፡ኢትፍገር፡ህግያ፡እብ፡ቴሌፎን፡ምስል፡ዋልደትካ፡ውላድካ፡ዎፈተችካ፡ዕረፍ፡ዎሰላም፡ሀይበካ፡ካኢትሕማቆ፡ሀለው፡ሀለው፡በሎ።

፨ክምሰልሁማ፡ደሩስ፡ላትፈቱ፡ደሩስ፡ጽዮን፡ወይ፡መዝሙር፡ሰላም፡እንዴ፡አፍገርኩም፡ዎ፡ረቢዬ፡ሰሀል፡ዉዴ፡ድረሶ።ሕላይ፡ላትፈቱ፡ሀዬ፡ሕላይ፡ወድ፡ሼክ፡ወይ፡ሕላይ፡ሄሌን፡መለስ፡እንዴ፡ከፈትኩም፡ከሽ፡በሎ።

እት፡መከለሲ፡እግል፡ኢበለኩም፡ቱ፡ላሓዜ፡እግል፡ኩሎም፡ሓውና፡ዎሓዋትና፡ዉላድና፡ዎአዋልድና፡እት፡ሞያ፡ሕክምና፡ክም፡ሓካይም፡ነረስስ፡ዎእሉ፡ለመስል፡ሽቅል፡ሻቁ፡ለሀለው፡እብ፡ጸሎት፡ፍቆዶም።

ገድም፡ምን፡ኩሉ፡መለገት፡ምስላ፡ፋግራ፡ለፍግራና፡እት፡እብል፡ናይ፡ዮም፡ምዕል፡ክቱብዬ፡አከትም።

የጊን፡ወድ፡ህብቴስ፡

እናስ፡መንሳዓይ።