መንቱ፡ ላሊ፡ ለኢሰክባ?
እብ፡ ሙሴ፡ በኪት።
02/28/2020
መንቱ ፡ ላሊ ፡ ለኢሰክባ?
ኣከሪት ፡ ለክሪት፡ ጀብለቱ
ደርሆ ፡ ተብዓት ፡ ለሰለስ ፡ ወክድ ፡ ልርኤ ፡ ሰዓቱ
ህመም ፡ ወድ ፡ ገሜነ ፡ ለለትጫፍር ፡ ዲብ ፡ ደብዓቱ
ገመል ፡ ለሹሙት ፡ ጀልወቱ
ኣቤር ፡ ግሱይ ፡ እት ፡ ከልወቱ
ከዋክብ ፡ ዓስተር ፡ ቃልዕ ፡ ዎላቃምጭ ፡ ዕንታቱ
በዐል ፡ ኣከር ፡ ለኢቃስነት ፡ መርባቱ
ጋን (ለሴረራይ) ኢሰክባ ፡ ከንዶእ ፡ ለእባቱ
በዐል ፡ ፍቲ ፡ ለሕማጥ ፡ ሻማቱ
ዓሳታት ፡ በሐር ፡ እት ፡ ልገቱ።
መንቱ ፡ ላሊ ፡ ለኢሰክባ?
እንጭራር ፡ እት ፡ ጻርሕ ፡ ዲብላ፡ ሰዐር ፡ እታ ፡ ከርሱ
ቃዋርዕ ፡ ምዕጥን ፡ ሕድ ፡ መግት ፡ ኖስ ፡ ኖሱ
ከልብ ፡ እት ፡ ናብሕ ፡ ፍርህ ፡ እት ፡ ነፍሱ
ሀበይ ፡ ዐስተር ፡ እግል ፡ ኢቲዳቅ ፡ ለዐል ፡ ላንቆትር ፡ ረኣሱ
ትካን ፡ ቃዋቅል ፡ ዓርቃይ ፡ ንጹፍ ፡ መኣሱ
ግዕል ፡ ከባብ ፡ ሽን ፡ ከደን ፡ ለሕያይ ፡ መንፈሱ
ሀድን ፡ ልትመየ ፡ ጫፍዕ ፡ ዎ ፡ ከዓሱ
ዓስከሪ ፡ ዋርድያ፡ ላሊ፡ ልነጀኒ ፡ ምን ፡ ርሳሱ
እሳት ፡ ተብዔናይ ፡ ትልጭ ፡ ልብል ፡ እብ ፡ ጥፍነቁ ፡ ዎ ፡ ፋኑሱ።
መንቱ ፡ ላሊ ፡ ለኢሰክባ?
በዐል ፡ ዕዳይ ፡ ለዕዳዩ ፡ ኢፋዲ
መዓግባይ ፡ (ክምቦብ) ፡ ለገለ ፡ ዋዲ
ግሁፍ ፡ ለልቡ ፡ ባዲ ፡ ምስል ሰላዲ።
መንቱ ፡ ላሊ ፡ ለኢሰክባ?
ጋሻይ ፡ ኢድሩር ፡ እብ ፡ ከኣሩ
ሚናኣደሚ ፡ ለባዲ ፡ ዳሩ።
መንቱ ፡ ላሊ ፡ ለኢሰክባ?
ጅህል ፡ መጎይላይ ፡ ለታናሰ ፡ ከበሮ
ምን ፡ ገለብ ፡ እት ፡ ምሕላብ ፡ ኣስክ ፡ ታሓታይ ፡ ሀበሮ
ለንጋለንጋ ፡ ምን ፡ ኩሉ ፡ ብቱክ ፡ ሰርሰሮ
ገድላይት ፡ ትተምነ ፡ ለጭገር ፡ በርበሮ
ኣርወ ፡ ስጡር ፡ ንሳሉ ፡ ለልትባላዕ ፡ ሐብሮ
ኣቅሕማይ ፡ ለምን ፡ ዓቅሙ ፡ ዎለዐል ፡ ራፍዕ ፡ ለዓጅበካ፡ ከኣፎ ፡ ክም ፡ ጻውሮ
በዐል ፡ ክዋና ፡ ተርህ ፡ ልትመየ ፡ ለምግዳ ፡ እት ፡ ለሳውሮ።
መንቱ ፡ ላሊ ፡ ለኢሰክባ?
ሓናኒት ፡ ረቢ ፡ ወደኮ ፡ እታ ፡
ከልል ፡ ትትመየ ፡ ክም ፡ ሓኪማይት ፡ ለእባ ፡ እብረታ
ረግዝ ፡ ትትመዬ ፡ እት ፡ ሰቴ ፡ ደማታ
ዎ ፡ እንታ ፡ ተሓምም ፡ እታ ፡ ዓመታ
እብ ፡ ሓዝ ፡ ዎክንክኒት ፡ ኢትሰክብ ፡ እት ፡ ዓርቃይ ፡ምን ፡ገብእ ፡ዎ ፡ ዓራታ።
መንቱ ፡ ላሊ ፡ ለኢሰክባ?
ሓጥር ፡ ከብደት ፡ ሓዬት ፡ ለባልዕ ፡ መገንድል
ዐንከቦተት ፡ ዓራታ ፡ ታሓብል ፡ ዎ ፡ ፈትል
ምንላ ፡ ለእግሉ ፡ ጻብጥ ፡ እግል ፡ ኦሮ ፡ ኢትፋጭል ፡ ዎ ፡ ኢትከፍል
ሓፋር ፡ ገናይዝ ፡ ለኣርድ ፡ ሓናፍል
ግራሻ ፡ ለሸወት ፡ ዕፉን ፡ ቃናብል
ሓሺል ፡ ወድ ፡ “ዓምር” ለዘነባዩ ፡ ሓምል
ሓዬት ፡ ዉጁህ ፡ በዐል ፡ ኤማን ፡ ዎ ፡ ጃምል
ክልሉ ፡ ዓቅብ ፡ ሃድእ ፡ እት ፡ እንቱ ፡ ዎ ፡ ካምል።
መንቱ ፡ ላሊ ፡ ለኢሰክባ?
ንህባይ ፡ ለለዓቅብ ፡ ኣፍ ፡ ልዳት፡ ቃፎ
እግል ክላ ለንህብ ፡ ዲሒን ፡ ዎ ፡ መንገፎ
ዎ ፡ ዓናጺት ፡ ለደመሚት ፡ ልትካረፎ።